La embaxada prieta

Ñaz güei esti blog. Ehí fora sigui gobernando Areces, sigui xintando y diendo de fartura en fartura... nel estranxeru nada d'importancia... Y el nuesu futuru sigui dependiendo d'una pita... ¿Qué-y vamos facer?

(15), quince. Quince son los díes qu'inda queden pal 8 setiembre, día ñacional d'Asturies dende qu'al principáu-y diere por oficializalu... En quince díes vamos ver los asturianos un país dividíu ente dos vergoñoses cites; d'un llau la que cunta col sofitu'l Comité de Comisarios Políticos (Alias: Gobiernu'l Principáu); que va ser una más d'eses que tanto-y gusten al nuesu presidente: Fartures, cánticos, gastu enorme de perres públiques y 0€ destinaos a cohesionar al nuesu país y a facer espoxigar la concencia ñacional....

Frente a esto, y lo que de xuru que va dar más vergoña, son los munchos actos políticos que van cellebrar per separtao Andecha Astur (AA), Izquierda Asturiana (IAS) y la Unión Asturianista (UAS). Unos, nun quieren asociase col "rexonalismu caducu y de centru drecha", demientres qu'otros pasen de facelo con "partíos radicales"... una cosa pola otra, y el resultáu ye siempres el mesmu, 3 cenes d'amigos, una per partíu, non más de 100 ó 200 asistentes a cada actu (de xuru) y una falta de rempuesta coleutiva a la vergoña d'actu que sofiten los Comisarios Políticos (alias: Conseyeros). Esto ye Asturies, y viendo como ta'l patiu col 8 setiembre, a mui pocos díes de qu'entame'l cursu...ye como una señal divina pa nun tener escesiva señaldá y ser quien a aguantar, a lo menos hasta'l mes de payares o más alló... Porque, pensándolo bien... ¿Con compatriotes asina, quién quier enemigos?

N'Asturies nun hain nin problemes ecolóxicos, nin problemes económicos, nin problemes sociales, nin problemes llingüísticos... hai un solu y únicu problema, un problema pergrande, y que munchos nun son quien a velu como un conxuntu sinon como munches partes... Si queremos, esti problema sedría como un "pulpo á galega", un centru neurálxicu que diba ser la tiesta'l pulpu, qu'estiende munchos de los sos brazos haza la economía, la llingüa, la ecoloxía y munches otres estayes.

¿Exemplos? Más bien sóbrennos. Ensin dir más lloñe, ta'l casu de Llanes, esa villa turística que nun hai tantos años yera un pacíficu y tranquilu pueblu turísticu... yera verdá que pel branu recibía los sos turistes, que dalgunos ricos facíen los sos xalés y que, más o menos, había un equilibriu tantu no ecolóxico como no económico... Agora bien, dende nun hai munchos años, el PXOU (Plan Xeneral d'Ordenación Urbanística) preve un crecimientu masivu,y un PXOU que yera pa ocho años, fínase namái en cuestión de dos. Agora, nesa villa marinero-turística, con cases tradicionales asturianes, mimetizada col paisax y equilibrada económica y ecolóxicamente, tán creciendo edificios descomanaos, bloques de formigón nel barriu de l'Arquera, y cientos y cientos de cases. Según un ecoloxista, nestos momentos habría 15.000 viviendes en construcción, cuando Llanes tien namái (y yá dende bien de tiempu) una población de 15.000 persones, lo que vien a ser que por cada llaniscu o llanisca hai a lo menos dos cases...

¿Ye un problema ecolóxicu? Non, ye un problema ñacional, ¿Por qué? Habríemos de dir a los planes políticos (quinquenales podríemos llamalos) del gobiernu ñacional d'Areces, que tres de la reconversión de les industries pesaes y estrautives (mineres) y del progresivu desmantelamientu del campu (Coles cuotes de llechi qu'impón Bruseles), namái sabe potenciar la nuesa economía invirtiendo nel turismu... Asina, mientres que se faen parques industriales pa que naide non los use (escasísimu éstiu), les campañes del "Paraíso Natural", centren tol potencial del verdor y de la playa y el monte asturianos pa que vengan equí los turistes. ¿Qué pasa? Que l'equilibriu france y polarízase'l crecimientu económicu nun focu turísticu que nun ye quién a asimilar nin planificar la so espansión, que s'espanda al estilu Benidorm, en cuenta de caltener l'estilu arquiteutónicu tradicional astur, y que daña muncho la ecoloxía del llugar. ¿Cómo se soluciona? ¿Diciendo "Non turistes, nun se fae más y zarrando la única industria asturiana que da perres (el turismu)? Non, faise redirixendo la política industrial y económica (si ye qu'hai dalguna), baxando los impuestos a les empreses pa qu'Asturies seya un llugar atrautivu (pero claro, pa eso deberíemos de tener autonomía fiscal, y non ser una provincia imperial más) y fomentando de verdá lo que les empreses ñecesiten. ¿QUé ñecesitamos? ¿Empreses pesaes? Pues a por elles, porque nun ye mui normal querer ampliar EL Musel si dempués se van dir zarrando toles empreses pesaes ¿O qué? Lo qu'hai agora, pasa porque los nuesos gobernantes amóldense al actual marcu competencial en vez de puxar por algamar mayor autonomía fiscal p'asina desendolcar polítiques económiques propies...

Llueu, sal na prensa qu'Asturies paguen-y la manutención la "solidariedá interautonómica".... ¿Por qué? Porque Asturies nun tien la capacidá de poner los sos impuestos, y vive con una presión fiscal que nun s'axusta a la que ñecesita un país en desendolcu... ¿Pa quién va l'impuestu de sociedaes? ¿Pa quién va l'IVA? Pa España, y España reparte dempués y nun salen les cuentes.. ¿Cómo van salir les cuentes si tenemos el mesmu impuestu de sociedaes n'Estremadura que n'Asturies o en Catalunya cuando les sociedaes y el grau de desendolcu nestos tres llugares ye abondo estremao? Esi ye'l problema n'asturies, que nun solo ye que nun haiga política industrial nin económica afayadiza, sinon que cualsiquier programa nesti ámbitu, taría subordináu a una política fiscal impuesta dende arriba que nun ye la más afayadiza a les nueses ñecesidaes.